Kumusta kayo, mga kids!    Mahilig kayong kumanta, di ba?  Pakikinggan natin ngayon ang isang kundiman na komposisyon ni José Rizal na pimagatang "Alin Mang Lahi". Halos nabaon na sa limot ang ating mga kundiman.  Sabi ng marami, hindi raw nila "type" ang kundiman dahil masyadong malungkot, o kaya naman ay sobrang sentimental daw.  Ano nga ba ang kundiman?   Halos lahat ng kundiman ay mga kanta na nagsasaad ng pag-ibig sa tinubuang lupa.

Nauso ang Kundiman noong panahon ng mga Kastila kung kailan walang kalayaan ang mga Pilipinong magpahag ng pagmamahal sa kanilang inang bayan.Ang ginamit na simbolo sa kundiman ay ang paglalarawan ng pag-ibig ng mga binata at dalaga sa bawa't isa tulad ng matatagpuan sa mga awiting harana.  Ginamit din sa paglikha ng tugtuging Kundiman ang mga estilong musikal at tema na taglay ng sinaunang mga Kumintang (warrior songs), mga Harana (courtship songs)  at mga Balitaw (folk songs).  Ngayon, lahat ng mga sina-unang mga kantang pag-ibig o "love songs" ng mga Pilipino ay tinatawag na ring  "kundiman".

Sabi ni "Titser Wes"

	Maliwanag na isinasaad sa kundimang "Alin Mang Lahi" na ang ipagtanggol ang Inang Bayan ay nasa puso at diwa ng bawa't isa.    Para kay José Rizal at sa lahat ng mga bayaning tulad nina Andres Bonifacio, Antonio Luna, Gregorio del Pilar, atbp, matamis ang magbuwis ng buhay at dugo upang makalaya ang Inang Bayan.  Ito ang isinasaad ng mga salitang,   Ang kamatayan man, kung saka-sakali Igiginhawa ng mga kalahi Tatanggapin ng may ngiti Kasaliw ang tuwang di mumunti   Nguni't ano ang mapait  na nangyayari? Higit na mapait at masaklap ang ipagkanulo ng kapuwa kababayan, tulad ng sinasabi sa istansang ito:   Nguni’t pagkasawing-plad yata Ng katagalugang napapanganyaya Ibukod pa sa ibang umaaba Lalong nagbibigay hapis ang ibang kapwa.   Ito ang katumbas ng pagmamalupit tayo sa ating sariling kababayan na walang kakayahang ipagtanggol ang kanilang sarili dahil sa kanilang kakulangan ng dunong at yaman.  I-click ang larawan ni Rizal upang pakinggan at mabasa ang titik ng "Alin Mang Lahi" Ang "Kundiman" ay isang tula na isinulat ni José Rizal sa tagalog, nguni't ito ay hindi isinalin sa musika.  Gayunpaman ang tema ay tulad rin ng lahat ng kundiman, ang matinding pag-ibig sa Inang Bayan.  Kundiman Tunay ngayong umid yaring dila't puso Sinta'y umiilag, tuwa'y lumalayo, Bayan palibhasa'y lupig at sumuko Sa kapabayaan ng nagturong puno. Datapuwa't muling sisikat ang araw, Pilit maliligtas ang inaping bayan, Magbabalik mandin at muling iiral Ang ngalang Tagalog sa sandaigdigan. Ibubuhos namin ang dugo't babaha Matubos nga lamang ang sa amang lupa Habang di ninilang panahong tadhana, Sinta'y tatahimik, iidlip ang nasa. Ayon kay Prof. Evelyn Cabanban, may isa pang kundimang isinulat ni Rizal na ginamit raw ng mga Kastila sa paglilitis kay Rizal bilang katibayan na ang nasabing kundiman ay ginamit ni Rizal upang susugan ang paghihimagsik laban sa España sa mga salitang, "Ibubuhos namin ang dugo'y ibabaha ng matubos lamang ang sa Amang lupa!" Dahil sa hindi pa ito lubos na napapatunayan, hindi isinama sa pahinang ito ang nasabing kundiman.

Ang pabalat sa librong Noli me Tangere

I-click ang larawan sa itaas upang pakinggan ang "Awit ni Maria Clara"

Iskwelahan ni Titser Wes